முகம் அறியாதவர்களுக்கும் உதவும் திரு. கேரி ஹாரிஸ்!

தமிழ்நாட்டின் காவிரிப்படுகையில் பசுமையான வயல்வெளிகளை கொண்ட அன்றைய அழகிய கிராமமான சின்ன சிங்கப்பூர் என்று அழைக்கப்படும் கூத்தாநல்லூரில் மன்பா உல் உல்லா பள்ளியில் தனது சிறு வயதில் மூன்றாம் வகுப்பு படித்த திரு. முகம்மது கேரி ஹாரிஸ் அவர்கள் கடல் கடந்து தனது தந்தை 

திரு. கப்பகலார் பஹ்ருதீன் ஷாயுடன் 1982ஆம் ஆண்டில் சிங்கப்பூருக்கு வருகிறார்.

தமிழ்மொழி வழியில் படித்தவர், தனது சிறுவயதிலேயே சிங்கப்பூருக்கு வந்ததும் புதியதொரு உலகத்தை பார்க்கிறார். கிராமத்தில் இருந்து அருகில் இருக்கும் நகரத்திற்கு சென்றாலோ அல்லது சென்னை போன்ற மாநகரத்திற்கு சென்றாலோ அதிசயித்து பார்க்கும் வயது அது. அப்படி இருக்க சிங்கப்பூர் வந்ததும் கூடுதல் மகிழ்ச்சி அவருக்கு, அன்று முதல் அவர் பலரிடம் கற்றுவருகிறார். பள்ளி மற்றும் கல்லூரி கல்வியை கடந்து எனலாம்.

கூடுதல் கேள்விகளுடன் திரு. கேரி ஹாரிஸ் அவர்களின் பயணத்தை பற்றி உரையாடினோம். அதை தங்கள் அனைவருடன் பகிர்வதில் கூடுதல் மகிழ்ச்சி அடைகிறோம்.

நீங்கள் கூத்தாநல்லூரில் படித்த மன்பா உல் உல்லா பள்ளிக்கு இன்று வரை சென்று வருகிறீர்களா?

ஆமாம், ஊருக்கு செல்லும் போதெல்லாம் மன்பா உல் உல்லா  பள்ளிக்கு சென்று வருகிறேன். அது ஒருவகை மனஅமைதியை தருகிறது. மேலும் அருகாமையில் உள்ள சில பள்ளிகளுக்கும் சென்று நேர்மறை பேச்சுக்களை வழங்கி வருகிறேன்.

தங்கள் சிங்கப்பூர் துவக்க நாட்கள் பற்றி கூறுங்கள்…

தொடக்க பள்ளி ஆசிரியர் திரு. மு. அ. மசூது அவர்கள் எனக்கு நிறைய கற்றுக் கொடுத்துள்ளார். அது என் வளர்ச்சிக்கு இந்த சூழலுக்கு ஏற்ப என்னை தகவமைத்து கொள்ள பெரிதும் உதவியது. என்னைப் போன்ற பல மாணாக்கர்களின் வளர்ச்சியில் அவரின் பங்கு அளப்பரியது என்பேன். மற்றும் அவரின் மனைவியும் திருமதி மரியம் பீவி ஆசிரியரே, இவர்கள் இருவரும் என்னை இன்று வரை வழிநடத்தி வருகிறார்கள்.

இன்று வரை இருவரும் குடும்ப உறுப்பினர்கள் போல உறவை பேணி காத்து வருகிறோம். எனது ஆசிரியர் திரு. மு அ மசூது அவர்களும் நிறைய சமூக பணிகளை இடைவிடாது செய்து வருகிறார்.

சிங்கப்பூர் தமிழ் வளர்ச்சிக்கு எனது இரு ஆசிரியர்களும் தங்களால் இயன்ற பங்களிப்பை தொடர்ந்து வழங்கி வருகிறார்கள்.

திரு. மு. அ. மசூது அவர்களின் மாணவன் என்பதை இப்பொழுதும் பெருமையுடன் கூறிக்கொள்வேன். நான் பிறருக்கு உதவி செய்வதாக பலர் கூறினாலும் அந்த எண்ணத்தை என்னுள் விதைத்தவர்களில் என் ஆசிரியர்களின் பங்கு மிக பெரியது.

சிங்கப்பூர் பன்முகத்தன்மை கொண்டது என்பதை எனக்கு புரியும் வகையில் எளிமையாக அதன் பண்பாடு, கலாச்சாரத்தை மையமாக கொண்டு விளக்கினார்கள்.

நீங்கள் வியந்து பார்த்த மற்றும் இன்றும் தங்கள் மனதில் ஆழமாக பதிந்துள்ளவற்றை கூறுங்கள்.

அன்றைய காலம் கிராமப்புற சூழல் (Kampong) என்போம். நாங்கள் வந்த புதிதில் அரபு தெருவில் வசித்து வந்தோம். தமிழர்கள், மலாய் மக்கள், சிங்கப்பூர் சீனர்கள், இந்தோனேசியர்கள், அரபு மக்கள் என பலரும் ஒரே இடத்தில் வசித்து வந்தோம்.

அங்கு அரபு மக்கள் அதிகம் வணிகம் செய்தார்கள். நிறைய சுற்றுலா பயணிகள் அங்கு  வருவார்கள்.

சிங்கப்பூர் உறுதி மொழியை உருவாக்கிய அன்றைய என்னுடைய நாடாளுமன்ற உறுப்பினர் ராஜரத்தினம் அவர்கள் தமிழ் சமூகத்திற்கு நிறைய பங்களிப்பை செய்து அனைவரின் வளர்ச்சிக்கும் பெரிதும் உதவினார். மேலும் அந்த காலத்தில் பலருக்கு நிரந்தர குடியுரிமை பெற உதவியவர். நாம் அனைவரும் அவரை பற்றி கண்டிப்பாக படித்து தெரிந்துக்கொள்ள வேண்டும். அப்பொழுது தான் நாமும் இந்த சமூகத்திற்கு எவ்வாறெல்லாம் உதவலாம் என்பதை பல்வேறு கோணங்களில் அறிய முடியும்.

சிங்கப்பூரில் தொடர்ந்து உதவி செய்தவர்கள் பட்டியலில் நீங்கள் இடம்பெற்று வந்தாலும், இதன் தொடக்க புள்ளி எதுவாக இருந்தது? இந்த எண்ணத்தை தங்கள் மனதில் விதைத்தவர் யார்?

வரலாற்று சிறப்பு வாய்ந்த சுல்தான் பள்ளி, மலபார் பள்ளியில் என் பெரியப்பா  திரு. கப்பகலார் அப்துல் கஃபூர் சுயநலமற்ற சேவகர். நான் சிங்கப்பூர் வந்த புதிதில் என் கைப்பிடித்து ஒவ்வொன்றாக சொல்லிக் கொடுத்தவர். அவர் எங்கு சென்றாலும் என்னை அழைத்துக் கொண்டு செல்வார். மேலும் செல்லும் இடங்களில் பார்க்கும் நண்பர்கள், உறவினர்களுக்கு என்னை அறிமுகம் செய்வார்.

அதே போன்று தான் என்னை சுல்தான் பள்ளி மற்றும் மலபார் பள்ளிகளுக்கு அழைத்து சென்றார். அங்கு வருபவர்களுக்கு அவர் உதவும் பொழுது பார்த்துக்கொண்டு இருந்த நான், படிப்படியாக அவருடன் சேர்ந்து நானும் சிறு வயதிலேயே உதவ துவங்கினேன். எந்த சூழலிலும் பெரியப்பா நீ பிறருக்கு உதவு என தெரிவிக்கவில்லை. அதே நேரம் அவரின் செயல் என்னை வெகுவாக கவர்ந்தது.

மேலும் சுல்தான் பள்ளியில் பெரும்பாலும் சிங்கப்பூர் மலாய் உறவுகள் உதவுவார்கள். மற்றும் மலபார் பள்ளியில் நம் மலையாளி உறவுகள் அதிகம் இருப்பார்கள், அவர்களும் பலருக்கும் உதவுவார்கள்.

மலாய் நண்பர்கள் மிகவும் அன்பானவர்கள், அவர்கள் தான் எனக்கு மலாய் கற்று கொடுத்தார்கள். மற்றும் ஆங்கிலமும் கற்று தருவார்கள்.

நான் சிந்தாவில் இணைந்த பொழுது, துவக்கத்தில் ஒரு மூத்த தொண்டூழியர் ஜெயமணி அம்மா பல நல்ல விடயங்களை கற்பித்தார். யார் நமக்கு எதை கற்பிப்பார்கள் என்பதை கணிக்க இயலாது என்பதை அந்த மூத்த தொண்டூழியர் ஜெயமணி அம்மா வழியாக நான் மிகவும் நன்று கற்றுக்கொண்டேன்.

தங்கள் பார்வையில் அன்றைய சிங்கப்பூர் எப்படி இருந்தது?

இன்று சிங்கப்பூருக்கு என்று நிறைய வரலாற்று சிறப்புகள், அடையாளங்கள் இருக்கிறது. ஆனால் அன்றைய நாட்களில் என்னுடைய சிறு வயதில் நிறைய மாமா கடை என இருக்கும், அவர்கள் 24 நேரமும் அங்கேயே இருப்பார்கள். அங்கேயே உறங்குவார்கள். அருகில் உள்ள வீடுகளிலேயே குளிப்பார்கள். இவர்களுக்கு என் அத்தா திரு. கப்பகலார் பஹ்ருதீன் ஷா போன்றவர்கள் உதவுவார்கள். கடை உரிமையாளர்களுக்கு ஓய்வளிக்க அவர்களின் கடைகளை இலவசமாக பல மணி நேரம் பார்த்துக் கொள்ளவும் செய்வார்கள்.

அவர்களுக்கு உதவும் எண்ணம் இயல்பாகவே இருந்தது, அதை பார்த்து வளர்ந்த எனக்கும் உதவுவது என்ற எண்ணம் பசுமரத்து ஆணி போல பதிந்தது.

கட்டிடங்கள் எவ்வளவு பெரியதாக இருக்கிறது என்பதை கடந்து அது சிறியதாக இருக்கும் கடைகளில் உயிரோட்டத்தை பெறுவது மிக கடினம். அந்த அளவு உயிர்ப்புடன் இருந்தது தான் இந்த மாமா கடைகள். அனைவருடனும் உரிமையுடன், அன்புடன் பழகுவார்கள் அதன் உரிமையாளர்கள்.

இதுவரை நீங்கள் பெற்ற விருதுகள்?

2008 – The Outstanding HR Professional Award

2010 – SINDA Outstanding Star Volunteer Leader Award

2010 – NTUC May Day Model Worker Award

2014 – Silent Heroes Aspirational Figures of Society Award

2014 – Distinguished  Community Service Award

2016 – National Safety and Security Award

2020 – Minister for Home Affairs National Day Award (Home Team Volunteers)

2013 – The Minister Of Defence Award

2023 – Community First Responder Award

2024 – Community First Responder Award

2025 – Excellent Social Service Award

2025 – Community First Responder Award

2026 – Community First Responder Award

போன்ற விருதுகளை சிங்கப்பூர் அரசிடம் இருந்தும், சமூக அமைப்புகளிடம் இருந்து  பெற்றுள்ளேன்.

பொதுவாழ்வில் உதவி செய்வது ஒருபுறம் இருக்க, பிறர் வணிகத்திலும் வளர நீங்கள் எவ்வாறு உதவுகிறீர்கள்?

அதற்கு என் நண்பர்களை உதாரணமாக கூறுவேன். நட்புவட்டத்தில் ஒருவர் வீடு வாங்க வேண்டும், விற்க வேண்டும் என என்னிடம் கூறினால் எனக்கு தெரிந்த வீட்டு முகவர் பைசலிடம் தெரிவிப்பேன். வீட்டு முகவர்கள் பெரும்பாலும் எனக்கு வணிக ரீதியாக உதவுவது கடினம் என்றாலும் என்னால் ஆன உதவியை அவர்களுக்கு எதையும் எதிர்பாராமல் உதவி வழங்குவேன்.

சமூகத்தில் சிறப்பாக இயங்கும் பலரின் தொடர்புகள் என்னிடம் இருப்பதால் அதனை திறம்பட பிறருக்கு பயன்படும் வகையில் கையாள்கிறேன்.

எனக்கு பிறருக்கு கொடுக்க வேண்டும் என்ற எண்ணமே அதிகம். எல்லோரும் முன்னரே வேண்டும் என்பதே என் எண்ணம். இன்று வரை அப்படியே உள்ளேன். வணிகம் கடந்து சேவையாகவே உண்மையான நட்புக்காக செய்கிறேன். என் முதலாளியும் அதே போலத்தான் பைசலை போல பலருக்கும் சமூக சேவை மூலம் அவர்களின் முன்னேற்றத்திற்கு உதவுகிறார்.

எனக்கு முன்பும் பல்வேறு நல்லுள்ளங்கள் செய்த செயல்கள் தான் இந்த சமூகம் இன்றும் சிறப்பான நிலையில் உள்ளது. அவர்கள் அளவிற்கு இல்லையென்றாலும் என்னால் ஆன பங்களிப்பை தொடர்ந்து வழங்கி வருகிறேன்.

மேலும் நானும், ராயல் கிங்ஸ் குழு நிறுவனர் திருவாளர் சிராஜுதீன் அண்ணனும் லாப நோக்கம் இல்லாமல் வணிகம் சார்ந்த உதவிகளை வழங்கி வருகிறோம். வாரி வாரி அள்ளிக் கொடுக்கும் கொடையாளி அல்லது தொண்டுள்ளம் கொண்ட வள்ளலைக் குறிக்கும் என்னுடைய முதலாளி. இன்னும் சொல்வது என்றால் நாங்கள் இருவரும் சமூகத்தின் இன்றியமையாத ஒரு முக்கியமான பாலமாகவே உள்ளோம்.

நீங்கள் இதுவரை கற்றுள்ள கல்வியை பற்றி பகிருங்கள்…

1) The Ong Teng Cheong Labour Leadership Institute (OTCi) – Diplomas in industrial and employment relations. 

2) Temasek Polytechnic – Diploma In Security & Fire Safety Studies

3) Temasek Polytechnic – Specialist Diploma in Corporate Secretarial Practice

போன்ற கல்விகளை பெற்றுள்ளேன்.

தெரிந்தவர்களுக்கே உதவி பலர் தயங்கும் இந்த சூழலில், நீங்கள் எப்படி தெரியாத நபர்களுக்கும் உதவி செய்து வருகிறீர்கள்?

நான் முன்னரே கூறியது போல எனக்கு சீனர்கள், மலாய் மக்கள் என பல இனத்தவர்கள் உதவி செய்துள்ளார்கள். இப்பொழுது அவர்களுடன் நான் நல்ல நட்பில் இருக்கலாம், ஆனால் ஆரம்பத்தில் அவர்களுக்கு என்னை யார் என்றே தெரியாது இருப்பினும் சிங்கப்பூர் கலாச்சாரத்தை, பண்பாட்டை, மொழிகளை கற்றுக்கொடுத்தார்கள் எவ்வித எதிர்ப்பார்ப்பும் இன்றி.

அதே போல தான் நான் மொழி, இனம் என அனைத்தையும் கடந்து உதவி செய்ய வேண்டும் என்பதில் மிக தெளிவாக உள்ளேன்.

உதாரணத்திற்கு விரைவு சாலைகளில் ஏதேனும் மகிழுந்து அல்லது இருசக்கர வாகனங்கள் பழுதடைந்து ஓரத்தில் நிறுத்தி இருந்தால் பலர் அவர்களுக்கு இருக்கும் வேலைப்பளுவில் கவனிக்காமல் செல்ல கூடும். ஆனால் நான் என்னுடைய வாகனத்தை நிறுத்தி அவர்களுக்கு ஏதேனும் உதவி தேவையா என தயக்கமின்றி கேட்பேன்.

அவர்களுக்கு உதவி தேவை என தெரிவித்தால் உடனடியாக அவசர உதவி செய்ய எப்பொழுதும் தயாராக இருக்கும் கட்டுப்பாட்டு அறைக்கு அழைத்து பாதிக்கப்பட்டவர்களுக்கு உதவ உரிய தகவல்களை வழங்குவேன்.

பெரும்பாலும் 10 – 15 நிமிடங்களுக்குள் போக்குவரத்து கட்டுப்பாட்டு பணியாளர்கள் அங்கு வந்து அங்கிருக்கும் வாகனத்தை அருகில் இருக்கும் வாகன நிறுத்தத்திற்கு கொண்டு செல்வார்கள். உதாரணத்திற்கு அது தேக்கா சந்தை, வணிக வளாகம் போன்ற இடமாக இருக்கலாம். அப்பொழுது தான் வாகனத்தின் உரிமையாளர்கள் அங்குள்ள கழிவறைகளை பயன்படுத்தலாம் மற்றும் ஓய்வெடுக்கவும் ஏதுவாக இருக்கும்.

சாலைகளில் செல்லும் பொழுது வாகனங்கள் பழுதடைந்தாலோ அல்லது விபத்துகள் ஏற்பட்டாலோ என்ன செய்வது என்று அறியாமல் திகைத்து நிற்பார்கள். நாம் செய்யும் சிறு உதவி அவர்களுக்கு மிக பெரிய உதவியாக இருக்கும்.

சில நேரங்களில் பயணத்தின் பொழுது நெஞ்சு வலி வந்து சிரமப்படுபவர்களும் உண்டு.

SG Secure App, Police and Civil Defence App போன்ற கைப்பேசி செயலிகளை சிங்கப்பூரில் உள்ள அனைவரும் நிறுவி கொள்வது நல்லது.

யாருக்கேனும் நெஞ்சு வலி போன்ற அவசர உதவி தேவைப்பட்டால் அவர்கள் அருகாமையில் இருக்கும் தொண்டு ஊழியர்களுக்கு தெரிவிப்பார்கள். காரணம் மருத்துவ உதவியாளர்கள் வர 10 முதல் 15 நிமிடங்கள் எடுக்கலாம்.

அதற்கு என்னை போன்றவர்கள் அங்கு சென்று முதல் உதவி செய்வோம், தேவைப்பட்டால் CPR (இதய-நுரையீரல் மீளுயிர்ப்பு) செய்வோம்.

இதுப்போன்ற சூழலில் இருதயம் 4 நிமிடங்கள் உயிர்ப்புடன் இருக்கும். நாம் சிறு உதவி அவர்கள் அந்த இக்கட்டான சூழலில் இருந்து மீள உதவும்.

அதன் பின்னர் காத்திருந்து அவசர ஊர்தி, செவிலியர் அல்லது மருத்துவர் யாரேனும் வந்த பின்னர் நோயாளியை ஒப்படைத்துவிட்டு நகர்வோம். உளவியல் ரீதியாகவும் அவர்கள் நம்பிக்கையுடன் இருப்பார்கள்.

CPR முறையை நாம் அனைவரும் கண்டிப்பாக தெரிந்து கொள்ள வேண்டும். அது நம் குடும்பத்தினருக்கு, நண்பர்களுக்கு என அனைவருக்கும் தக்க நேரத்தில் உதவும்.

மேலும் வாகன விபத்துகளை பார்க்கும் பொழுது ஆரம்பத்தில் நாம் பயப்பட்ட வாய்ப்புண்டு, அதை கடந்து உதவி செய்தால் கண்டிப்பாக அடுத்தடுத்த உதவிகளின் பொழுது மிக தெளிவாக சரியாக கையாள்வோம்.

எப்பொழுதும் சமூக சூழலை கவனித்து வரும். ஏதேனும் பிரச்சனை என்றாலும், உதவிகள் தேவைப்பட்டாலும் உரிய கட்டுப்பாட்டு அறைக்கு அழைத்து தெரிவிப்பேன்.

தற்பொழுது எல்லாம் நான் அழைத்தாலே என் குரலை வைத்தே அவர்கள் என்னை எளிதாக கண்டறிந்து விடுவார்கள் அந்த அளவிற்கு நான் இந்த கட்டமைப்புகளை திறம்பட தொடர்பு கொண்டு உதவிகளை கிடைக்க செய்கிறேன்.

அவர்களுக்கு உதவும் பொழுது நமக்கும் ஒரு மனநிறைவு கிடைக்கும். மற்றும் பாரமாக அது தெரியாது.

இங்கே உதவிகள் செய்வதற்கு பாராளுமன்ற உறுப்பினராக இருக்க வேண்டும் என்ற அவசியமில்லை. ஒரு இருட்டான சூழலை கண்டால் அங்கு விளக்குகளை பொருத்தினால் பாதுகாப்பான சூழலை உருவாக்கலாம் தீபாவளியைப் போல். அதற்கு சில படங்கள், காணொலிகளை கைப்பேசி வழியாக எடுத்து மின்னஞ்சல் அனுப்பினால் போதும். அதுவும் தற்பொழுது OneService என்ற கைப்பேசி செயலி உள்ளது. இதன் மூலம் இதுப்போன்ற புகார்களை உரிய துறைகளுக்கு எளிதாக கொண்டு செல்லலாம்.

சிங்கப்பூரில் பல பணியாளர்கள் இரவு, பகல் பாராமல் உழைக்கிறார்கள். புகார் தெரிவித்த பின்னர் 3 மணி நேரத்திற்குள் அவர்கள் நேரடியாக வந்து தகவல்களை சேகரித்து ஆவணப்படுத்துவார்கள்.

சிங்கப்பூரை கட்டமைத்த முன்னாள் பிரதமர் “லீ குவான் யூ” அவர்கள் காவல்துறை, அமைச்சகம் போன்று சமூக காவலர்களுக்கான கட்டமைப்பை உருவாக்கினார். அதில் பொதுமக்கள், கடை உரிமையாளர்கள், உணவக உரிமையாளர்கள் என பலரும் செயல்படுவார்கள். அவர்கள் உதவிகளும் செய்வார்கள், காவல்துறைக்கும் தெரிவிப்பார்கள். இதன் மூலம் மிக பெரிய அசம்பாவிதம் நடைபெறும் முன்னரே அது தடுக்கப்படும். இதில் சிங்கப்பூரில் இருக்கும் வெளிநாட்டவர்களும் பங்களிக்கலாம். இதற்கென முழுநேரமாக செயல்பட வேண்டியதில்லை. மற்றும் காவல்துறையினர் வீட்டு பணிப்பெண்களுக்கும் பாதுகாப்பு தொடர்பான பயிற்சிகளை அளித்து வருகிறார்கள்.

சந்தையில் ஒரு சண்டை நடந்தாலோ அல்லது தேநீர் நிலையத்தில் ஒருவர் கத்தியுடன் இருந்தாலோ உடனடியாக நீங்கள் 71999 எண்ணிற்கு குறுஞ்செய்தி அனுப்பலாம். நீங்கள் அனுப்பும் ஒரு குறுஞ்செய்தி அங்குள்ளவர்கள் பாதுகாப்பை உறுதி செய்யும் மற்றும் உங்களின் தனிப்பட்ட தகவல்கலை பகிர வேண்டிய தேவையில்லை.

நீங்கள் படங்கள் அல்லது காணொலிகள் எடுத்தால் SG Secure கைப்பேசி செயலி வழியாகவும் இதுப்போன்ற சம்பவங்களை தெரிவிக்கலாம்.

மேலும் “உளவியல் சார்ந்த முதல் உதவி” கல்வியையும் பெற்றுள்ளேன். சிங்கப்பூரில் பெரும்பாலும் பாதுகாப்பாக இருப்பதை உணர்வோம், ஆனால் வெளியில் செல்லும் பொழுது இது நம் அனைவருக்கும் தேவையான திறன் என்பேன்.

தற்பொழுது முதல் உதவி செய்பவர்கள் எண்ணிக்கை ஒரு வீட்டு தொகுப்பிற்கு ஒருவர் என்று உள்ளது. ஆனால் அடுத்த 5 – 10 ஆண்டுகளுக்குள் ஒரு வீட்டிற்கு ஒருவருக்கு முதல் உதவி தெரிந்து இருக்க வேண்டும் என்பதே இலக்கு. அப்படியான சூழலை எட்டிவிட்டால் அவர்கள் மூலம் குடும்பத்தினருக்கு சுற்றியுள்ளவர்களுக்கு உதவ இயலும்.

ஆக சிறந்த சமூகத்தை உருவாக்க தமிழ் இளையோர்கள் ஏன் தயக்கமின்றி உதவ முன்வர வேண்டும்?

இங்கு நாம் சிறும்பான்மையினர், ஆகவே நாம் அனைவருக்கும் ஒருவருக்கு ஒருவர் உதவி செய்ய வேண்டும். அதன் தொடர்ச்சியாக பிறருக்கும் உதவ வேண்டும். அப்படி செய்தால் பெரும்பான்மையினரும் நமக்கு உதவுவார்கள். நம் சமூகத்தில் இருந்து பல தொண்டு ஊழியர்கள் வருகிறார்கள், இதில் இளையோர்கள் அதிகம் பங்களிக்க வேண்டும்.

இன்றைய சூழலில் ஒரு முதியவருக்கு உதவ இரு இளையோர்கள் தேவைப்படுகிறார்கள். நம் முன்னோர்கள் சிங்கப்பூர் வளர்ச்சிக்கு சிறப்பாக பங்களித்து உள்ளார்கள். அதைப் பின்பற்றி நம் இளையோர்களும் பங்களிக்க வேண்டும். மேலும் அடுத்த தலைமுறைக்கான தலைவர்களை உருவாக்க வேண்டும் அவர்களை திறம்பட வழிநடத்த வேண்டும். நம் சமூகம் வலுவானது, அதனை அடித்தளமாக கொண்டு இளையோர்களை வளர்த்தெடுக்க வேண்டும்.

சிங்கப்பூருக்கு வரும் இளையோர்கள் தங்கள் தரப்பு பங்களிப்பை வழங்க எந்தெந்த குழுக்களில் இணைய வேண்டும்?

நீங்கள் எந்த நாட்டை சேர்ந்தவர்களாக இருந்தாலும் Red Cross, Civil Defense First Aider அமைப்புகளில் இணைத்து பங்களிக்கலாம்.

24 Asia என்ற கட்டமைப்பில் இருந்து வெளிநாட்டு ஊழியர்களின் கற்றலுக்கு, வளர்ச்சிக்கு உதவலாம். இதில் நானும், சிராஜுதீன் அண்ணனும் தொடர்ந்து பங்களித்து வருகிறோம். உதாரணத்திற்கு ஞாயிறு தோறும் கணினி வகுப்புகள் எடுப்பது, மொழி பாடங்கள் எடுப்பது, தொழில் சார்ந்த கல்விகளை வழங்குவது.

வெளிநாட்டில் இருந்து சிங்கப்பூருக்கு பணிக்கு வரும் பலரும் ஆரோக்கியமாக, வலுவாக உள்ளார்கள். ஆனால் வார இறுதியில் அவர்களின் விலைமதிப்பற்ற நேரத்தையும், பணத்தையும் செலவித்து மது அருந்துகிறார்கள். இதனால் அவர்கள் உடல்நிலை பாதிக்கப்படுகிறது, சேமிப்பை இழக்கிறார்கள். மருத்துவமனைக்கு சென்றால் அதற்குரிய கட்டணத்தை செலுத்த முடியாமல் சிரமப்படுகிறார்கள். அதன் பதில் அவர்கள் தங்களை வளர்த்து கொள்ள புதியவற்றை கற்கலாம், தொழில் துவங்கலாம். இந்த நாடு வளர்ச்சிக்கானது, அதை உணர்ந்து அவர்கள் செயல்பட வேண்டும் என்பதே என் எண்ணம்.

“சிங்கப்பூரில் இருக்கும் அனைவரும் தொடர்ந்து படிக்க வேண்டும் அது பள்ளி கல்வி அல்லது கல்லூரி கல்வியுடன் முடிவடைவது இல்லை.”

செயற்கை நுண்ணறிவு வந்துவிட்டது, நாம் சந்தையில் இருக்க வேண்டும் என்றால் அதையும் படிக்க வேண்டிய சூழல். தற்பொழுது வாகனம் ஓட்ட ஓட்டுநர் உரிமம் பெற்று வருகிறோம். எதிர்காலத்தில் தொழில் நுட்ப வளர்ச்சியினால் தானியங்கி வாகனங்கள் அதிகமானால் ஓட்டுநர் உரிமம் தேவைப்படாமல் கூட போகலாம்.

சாலை தோண்டும் கருவிகளை கையாள படிக்கிறோம், எதிர்காலத்தில் இந்த பணிகளை எங்கிருந்து வேண்டும் என்றாலும் கையாளும் சூழல் வரலாம். ஒருவரே ஒன்றுக்கு மேற்பட்ட கருவிகளையும் ஒரே நேரத்தில் கையாளலாம்.

அலுவலக பணியுடன் எதிர்பாராதவிதமாக வரும் உதவிகளை எவ்வாறு கையாள்கிறீர்கள்?

என் அலுவலகத்திற்கு சூழலை விளக்குவேன் மற்றும் வாடிக்கையாளர்களுடன் திட்டமிட்டு சந்திப்புகளை அதற்கு ஏற்ப மாற்றி அமைப்பேன். தடுமாற்றமின்றி இவைகளை கையாள்வேன். இதன் மூலம் உதவிகளை செய்ய இயலும், பணிகளையும் கையாள இயலும். இரண்டையும் குழப்பி கொள்வதில்லை.

உங்களிடம் பேசிக்கொண்டே இருக்கலாம் அண்ணா அந்த அளவிற்கு சிறப்பாக உரையாடினீர்கள் என கேரி ஹரிஸ் அண்ணனிடம் இருந்து விடைப்பெற்றோம்.