கர்நாடகத்தின் உரிமைக்காக முன்னாள் பிரதமரே களத்தில் இறங்குகிறார்!
தமிழ்நாட்டின் நீர் உரிமைக்காகத் தமிழக முதலமைச்சர் என்ன செய்கிறார்?
காவிரி நதிநீர் விவகாரத்தில் கர்நாடகத்தைச் சேர்ந்த முன்னாள் பிரதமர் எச்.டி. தேவகவுடா, பிரதமர் நரேந்திர மோடிக்குக் கடிதம் எழுதி, காவிரி நடுவர் மன்றத் தீர்ப்பை மறுஆய்வு செய்ய வேண்டும், மேகேதாட்டு அணைத் திட்டத்திற்கு விரைந்து அனுமதி வழங்க வேண்டும் உள்ளிட்ட கோரிக்கைகளை முன்வைத்துள்ளார்.
கர்நாடகத்தின் ஆளுங்கட்சி, எதிர்க்கட்சி என அனைவரும் அரசியல் வேறுபாடுகளைக் கடந்து தங்கள் மாநிலத்தின் நீர்வளத் தேவைக்காக ஓரணியில் நின்று குரல் கொடுக்கின்றனர்.
அதேபோல, முல்லைப் பெரியாறு அணை விவகாரத்திலும் கேரள அரசு தனது நிலைப்பாட்டைத் தீவிரப்படுத்தி, சட்ட நடவடிக்கைகளில் இறங்குகிறது.
இவ்வாறு அண்டை மாநிலங்கள் தங்கள் உரிமைகளுக்காகத் தீவிரமாகப் போராடும்போது, தமிழ்நாட்டின் நீர்வள உரிமைகளைப் பாதுகாப்பதில் நமது அரசின் அரசியல் உறுதியும் செயல்பாட்டு வேகமும் எங்கே?
மேகேதாட்டு அணை விவகாரத்தில் கர்நாடகத்தின் ஒவ்வொரு நகர்வுக்கும் தமிழகத்தின் பதில் என்ன? வெறும் எதிர்ப்புத் தீர்மானங்களால் மட்டும் உரிமையை நிலைநாட்ட முடியுமா?
முல்லைப் பெரியாறு அணையில் 152 அடி நீரைத் தேக்குவதற்கான உரிமையைப் பெறவும், அணையைப் பலப்படுத்தும் பணிகளை விரைவுபடுத்தவும் அரசு மேற்கொண்ட நடவடிக்கைகளின் பலன் என்ன?
தமிழகத்தின் காவிரி, முல்லைப் பெரியாறு மற்றும் பாலாற்றின் உரிமைகள் ஒவ்வொன்றாகச் சவாலுக்கு உள்ளாகும்போது, அனைத்துக் கட்சிகளையும் ஒருங்கிணைத்துப் பிரதமரைச் சந்திக்க முதலமைச்சருக்கு இன்னும் என்ன தயக்கம்?
தமிழக அரசு நடவடிக்கை எடுத்ததாகக் கூறுவதைவிட, அந்த நடவடிக்கைகளால் தமிழகத்தின் உரிமைகள் எந்த அளவுக்குப் பாதுகாக்கப்பட்டுள்ளன என்பதுதான் மக்களுக்குத் தேவை.
தமிழகத்தின் உரிமையைப் பாதுகாப்பதில் அரசுக்கு உண்மையான அக்கறை இருக்கிறதா?, அல்லது ஆட்சியில் இருப்பதே போதும் என்று நினைக்கிறதா? என்பதற்கு முதலமைச்சர் பதில் சொல்ல வேண்டும்.
தமிழகத்தின் நீராதார உரிமைகள் என்பது அரசியல் கட்சிகளின் தனிப்பட்ட பிரச்சினையல்ல. கோடிக்கணக்கான மக்களின் உயிராதாரப் பிரச்சினை. இதில் இனியும் மெத்தனம் காட்டாமல், அனைத்துக் கட்சிக் கூட்டம் நடத்தி, சரியான காலக்கெடு நிர்ணயிக்கப்பட்ட உறுதியான செயல்திட்டத்தைத் தமிழக அரசு உடனடியாக அறிவிக்க வேண்டும் எனத் தமிழக வாழ்வுரிமைக் கட்சியின் சார்பில் வலியுறுத்திக் கேட்டுக்கொள்கிறேன்.
—
தி. வேல்முருகன்,
தலைவர்,
தமிழக வாழ்வுரிமைக் கட்சி.


