இலங்கை விவகாரத்தை சர்வதேச குற்றவியல் நீதிமன்றத்தில் பாரப்படுத்தவேண்டும் – பிரிட்டன் அரசிடம் வேண்டுகோள் விடுத்துஅம்பிகா செல்வகுமார் சாகும் வரை உணவு தவிர்ப்புப் போராட்டம்

ஐக்கியநாடுகள் மனித உரிமை பேரவை இலங்கையை சர்வதேச குற்றவியல் நீதிமன்றத்திடம் பாரப்படுத்தவேண்டும் என்பது உட்பட மூன்று கோரிக்கைகளைமுன்வைத்து லண்டனில் தமிழ் பெண்ணொருவர் சாகும்வரை உண்ணாவிரதப்போராட்டத்தை பிப்ரவரி 27 ,2021 ஆம் திகதி ஆரம்பித்துள்ளார் .

ஜெனீவாவில் ஆரம்பமாகியுள்ள ஐக்கிய நாடுகள் மனித உரிமை பேரவையின் அமர்வில் பிரிட்டன் சமர்பித்துள்ள தீர்மானத்தில்

• இலங்கையை சர்வதேச குற்றவியல் நீதிமன்றுக்கு பரிந்துரைத்தல்
• சர்வதேச சுயாதீன புலனாய்வுப் பொறிமுறையை உருவாக்குதல்
• இலங்கைக்கான ஐ.நா. நிரந்தர சிறப்புப் பிரதிநிதியை நியமித்தல்

போன்றவற்றை உள்ளடக்க வேண்டும் என பிரிட்டன் அரசிடம் வேண்டுகோள் விடுத்து சாகும் வரை உணவு தவிர்ப்புப் போராட்டம் ஒன்றை அம்பிகா செல்வகுமார்  ஆரம்பித்துள்ளார்.

அம்பிகா செல்வகுமார்சர்வதேச இனப்படுகொலையைத் தடுத்தல் மற்றும் வழக்காடு மையத்தின் பணிப்பாளராக அம்பிகை பணியாற்றுகின்றார். அத்துடன் தொடர்ச்சியாக தமிழர்களின் பிரச்சினையை சர்வதேச மயப்படுத்தும் நோக்கத்துடன் செயற்பட்டு வருகிறார் என்பது குறிப்பிடத்தக்கது .

மேலும், உலகத்தமிழர்கள் அனைவரும் வேற்றுமைகளின்றி ஆதரவு அளிக்க வேண்டு என அம்பிகை செல்வகுமார் கோரிக்கை விடுத்திருந்தார்.

அம்பிகை செல்வகுமார், சாகும் வரை உணவுத் தவிர்ப்புப் போராட்டத்தை லண்டனில் பிப்ரவரி 27 ,2021 ஆம் திகதி ஆரம்பித்த நிலையில் அவருக்கு வலுச் சேர்க்கும் வகையில் யாழ்ப்பாணம் பல்கலைக்கழக மாணவர்கள் நல்லூரில் உணவுதவிர்ப்புப் பிப்ரவரி 28 ,2021 ஆம் திகதி போராட்டத்தை ஆரம்பித்துள்ளனர்.

பல்கலைக்கழக  மாணவர்கள் இருவருடன் வேலன் சுவாமிகள், அருட்தந்தையர்கள் இருவர் என ஐந்து பேர் இந்தப் போராட்டத்தை முன்னெடுத்துள்ளமையும் குறிப்பிடதக்கது.இந்நிலையிலேயே இவரது போராட்டத்திற்கு ஆதரவு தெரிவித்து யாழ். நல்லூர் பகுதியில் யாழ். பல்கலைக்கழக மாணவர்கள் போராட்டத்தில் ஈடுபட்டுள்ளமையும் குறிப்பிடதக்கது.

லண்டன் நகரின் புற நகர பகுதிகளான கொவண்றி, மற்றும் ரக்பி பகுதி மக்கள் இணைந்து சாகும் வரையிலான உண்ணாவிரத போராட்டத்தினை நடாத்தி வரும் அம்பிகா செல்வகுமார் அவர்களுக்க்கான ஆதரவினை நல்கும் வண்ணம் மார்ச் 02,2021 ஆம் திகதி வாகன பேரணியாக அவர் உண்ணாவிரதம் மேற்கொள்ளும் அரங்கிற்கு வருகை தந்தனர்.

அம்பிகா செல்வகுமார் அவர்களின் 9 ம் நாள் உண்ணாவிரத போராட்டத்திற்கு ஆதரவாக டொரோண்டோவில் ஆர்ப்பாட்ட பேரணி மார்ச் 7,2021 ஆம் திகதி முன்னெடுக்கப்பட்டுள்ளது.

இதனை தொடர்ந்து வரும் மார்ச் 9,2021 ஆம் திகதி கியூபெக் நகரில் அமைந்துள்ள பாராளுமன்றத்தின் முன் போராட்டம் நடத்த உள்ளனர் என்பதும் குறிப்பிடத்தக்கது.